Gjendjen aktuale politike në vend, mocionin për rrëzimin e qeverisë dhe procedimin e demarkacionit në kuvend, analisti Astrit Gashi, po e sheh si lojë taktike dhe politike në mes të dy partive të koalicionit qeverisës, dhe se tani po shikohet vetëm se kujt t’i mbetet faji.

Tutje, prezencën e ambasadorit amerikan, Greg Delawie, në mbledhjen e grupit parlamentar të LDK-së, Gashi e konsideron si veprim të panevojshëm dhe si i tillë është ofendues për deputetët e LDK-së, njofton Klan Kosova.

“Amerikanët i kanë thënë të gjitha. Në fakt ambasadori sot nuk ka thënë më shumë se ajo çka është thënë në komunikatë. Jam i bindur që pas takimit deputetët nuk kanë ndërruar qëndrim. Kemi një lojë taktike e politike të dy partive politike në Kosovë. Nesër në fakt topi është tek PDK-ja, nëse nuk del demarkacioni para mocionit, PDK-ja duhet të vendos a po e do Isa Mustafen apo jo” ka thënë Astrit Gashi në një intervistë në Zona B të Klan Kosovës.

Ndërsa analisti Ilir Mirena ka thënë që LDK-ja, duke përdorë influencën amerikane po luan lojën që PDK-ja bënte dikur.

“Në secilin vendim të mundshëm PDK-ja ka përdorë influencën e ambasadës amerikane, ndonjëherë edhe e ka keqpërdorë. E LDK-ja po luan lojën e njëjtë” ka thënë Mirena, në një intervistë në Zona B të Klan Kosovës.

E analisti Petrit Zogaj ka thënë që Isa Mustafa do të mbetet po aq i fuqishëm sa është sot, edhe në qoftë se bie qeveria.

“Isa Mustafa, edhe në qoftë se rrezohet qeveria, do të jetë po aq i fuqishëm sa është sot. Kjo ngaqë do të dale që PDK-ja ka dashur të largoj Isa Mustafën” ka thënë Petrit Zogaj.